Porokireri

Serge Brammertz

Porokireri Mukuru w’Urwego rw’Inkiko Mpanabyaha Mpuzamahanga guhera ku itariki ya 29 Gashyantare 2016.

Yavukiye Eupen mu Bubiligi mu mwaka wa 1962.

Ku itariki ya 29 Gashyantare 2016, Serge Brammertz yagizwe Porokireri wa MICT n’Inama Ishinzwe Amahoro ku Isi y’Umuryango w’Abibumbye.

Dogiteri Brammertz yari asanzwe ari Porokireri Mukuru w’Urukiko Mpanabyaha Mpuzamahanga Rwashyiriweho icyahoze ari Yugosilaviya kuva ku itariki ya 1 Mutarama 2008. Azakomeza izo nshingano azifatanyije n’iyo mirimo ashinzwe muri MICT.

Mu gihe kirenga imyaka icumi, Dogiteri Brammertz yakoze mu myanya y’ubuyobozi ashinzwe gukora amaperereza ku byaha bikomeye byo mu rwego mpuzamahanga no kubikurikirana. Mbere yo guhabwa umurimo akora ubu, muri Mutarama 2006, Umunyamabanga Mukuru w’Umuryango w’Abibumbye, Kofi Annan, yamugize Komiseri muri Komisiyo Mpuzamahanga Yigenga y’Umuryango w’Abibumbye yashinzwe gukora iperereza ku iyicwa ry’uwahoze ari Minisitiri w’Intebe wa Libani, Rafik Hariri; yagumye muri uwo mwanya kugera mu mpera z’umwaka wa 2007. Mbere yaho, muri Nzeri 2003, Inteko y’Ibihugu byashyize umukono kuri Sitati za Roma yamutoreye kuba Porokireri Wungirije w’Urukiko Mpanabyaha Mpuzamahanga (ICC). Muri uwo mwanya, yari ashinzwe gushyiraho Ishami ry’Ibiro bya Porokireri rishinzwe amaperereza, anatangiza amaperereza ya mbere y’Urukiko Mpanabyaha Mpuzamahanga muri Uganda, Repubulika Iharanira Demokarasi ya Congo no muri Darfur.

Mbere yo guhabwa izo nshingano zo mu rwego mpuzamahanga, Dogiteri Brammertz yabanje gukora nk’umucamanza mu gihugu cye, hanyuma aba umuyobozi w’Ibiro bya Porokireri mu Bwami bw’u Bubiligi. Muri iyi myanya, yayoboye amaperereza n’imanza nyinshi zirebana n’ibyaha biteguye bihuriweho, iterabwoba, ubucuruzi mpuzamahanga bw’ibiyobyabwenge, icuruzwa ry’abantu n’ibikorwa byo kunyuranya n’amategeko mpuzamahanga arengera abantu mu gihe cy’intambara. By’umwihariko, umurimo we wibanze ku bikorwa byo guhuriza hamwe amaperereza hagati y’ibihugu, gukomeza ibikorwa by’igiporisi cyambukiranya imipaka n’ubufatanye mu bucamanza mpanabyaha. Byongeye kandi, nk’impuguke muri ibyo bibazo n’ibindi bijyanye na byo, yakoreye Komisiyo y’u Burayi, Inama y’u Burayi n’Umuryango Mpuzamahanga ukurikirana abimukira (OIM).

Hagati y’umwaka wa 1989 n’uwa 1997, yabaye Subusititi na Subusititi wa mbere wa Porokireri mu Rukiko rwa Mbere rw’Iremezo rwa Eupen (mu Bubiligi). Nyuma yaho yabaye uwungirije Porokireri Mukuru mu Rukiko rw’Ubujurire rwa Liège.

Ubu Dogiteri Brammertz ni umwe mu bagize Komite Nshingwabikorwa y’Umuryango Mpuzamahanga w’Abaporokireri (International Association of Prosecutors), kandi mbere yaho yari Perezida w’Ihuriro ryimakaza ubufatanye mu bucamanza mu Burayi (European Judicial Network). Yanditse kandi yigisha cyane ku birebana n’iperereza n’ikurikirana ry’ibyaha by’urusobe, ku giporisi cy’u Burayi n’igiporisi mpuzamahanga no ku bufatanye mu manza z’inshinjabyaha, ku mategeko mpuzamahanga arengera abantu mu gihe cy’intambara, ku byaha biteguye bihuriweho, ku iterabwoba no kongera ubushobozi bw’abacamanza. Yabaye porofeseri mu by’amategeko muri Kaminuza ya Liège kugera mu mwaka wa 2002.

Dogiteri Brammertz afite impamyabumenyi mu mategeko yo muri Kaminuza ya Louvain-la-Neuve, n’impamyabumenyi mu bumenyi bw’ibyaha n’abanyabyaha (Criminology) yo muri Kaminuza ya Liège n’impamyabumenyi y’ikirenga (PhD) mu mategeko mpuzamahanga yakuye muri Kaminuza ya Albert Ludwig, i Freiburg, mu Budage. Mu rwego rwo kubona iyo mpamyabushobozi y’ikirenga, yakoze ubushakashatsi bwabyaye inyandiko yamuritse ivuga ku «Bufatanye bw’igiporisi cyambukiranya imipaka».